Tvöfalt óréttlæti

Mér er málið skylt,   mamma er ljósmóðir.    Hún hugsar að vísu vel um mig og hin börnin sín líka, við fáum nóg að borða og hún fer stundum með mig í göngutúr.    Hún fer sjaldan nokkuð annað út nema í sveitina en það kostar ekki neitt.    Hún er stundum að hugsa hvenær komi sá dagur og hvenær hún fái þau laun að hún geti átt mörg skópör í öllum litum eins og konan í blaðinu í morgun.    Hvenær hún geti ferðast til útlanda á hverju ári eins og svo margir gera.    Hún er samt heppin því hún fær ennþá barnsmeðlag með minnsta barninu sínu (ekki mér)   en það er af því hún er ekkja.     Svo fær hún smápening frá stéttarfélagi mannsins síns heitins sem kallast makalífeyrir en það eru tæplega 15 þúsund krónur á mánuði.     Mamma er búin að vera ljósmóðir í 29 ár og hún hefur líka tekið sérmenntun innan fagsins sem tekur 2 ár að læra.   Það er samt ekkert metið sérstaklega í launum.     En eftir  29 ár í ljósmóðurstarfinu hefur hún náð að skríða yfir 300 þúsund krónur í mánaðarlaunum og þá er eftir að draga frá skatta og skyldur - þegar það er búið þá eru eftir rúmlega 200 þúsund krónur.     Einhver þarf kannski að gera sér að góðu að lifa af lægri upphæð en þetta, en þá er ekki  6 ára háskólanám og 2 ára sérnám á bak við það.    Þó ég sé bara hundur og ekkert sérstaklega gáfaður þá skil ég að mömmu svíði það óréttlæti sem hefur gengið svo lengi gagnvart hennar starfsstétt.     Hún er svo þakklát fyrir allan stuðninginn sem almenningur sýnir ljósmæðrum að ég sé stundum að hún fær tár í augun.     Hún hefur líka fengið tár í augun þegar hún hefur hlustað á það sem fjármálaráðherrann segir þá verður hún reið - það er ekkert skrítið hann bullar bara. 

Ekki kvennaleiðrétting, heldur barátta fyrir mati menntunar

Börnin í forgang

Í þessu máli virðist okkur að það þurfi fyrst og fremst að hugsa um hag barnanna - þau eiga að fyrst og fremst að fá öruggt skjól eftir svona áföll og vonandi verður þeim fundinn samastaður þar sem þau geta notið æskunnar og fengið atlæti sem best hæfir börnum.

Allt of oft hafa börn verið látin gjalda fyrir mistök foreldra sinna og verið svipt æsku sinni og öryggi sem öll börn ættu skilyrðislaust að njóta á meðan þau eru börn. 

Megi góður Guð vernda þessa drengi og styrkja fjölskyldur þeirra.

Barnaverndarstofa rannsakar málið

Er munur á því hvort kona eignast barn eða fæðir?

Ja, mamma segir stóran mun á því þar sem karl og kona geta eignast barn án þess að konan fæði það.    En líklega getur enginn fætt barn nema konan.     Mamma veltir því stundum fyrir sér hvort frægu stórstjörnurnar hafi gengið með og alið sjálfar börnin sem þær eignast ???

Ég vildi bara deila þessum vangaveltum hennar með ykkur.

Salma Hayek orðin móðir

Þegar lítið barn deyr...

.....fyllumst við sorg og vanmætti og við finnum til með foreldrunum og öðrum ástvinum sem sjá á bak saklausu barni.

Enþegar við lesum hugleiðingar móður dauðvona barns og sjáum hvað "kerfið" er óréttlátt fyllumst við líka reiði sem beinist gegn kerfi sem mismunar og vanmetur þegna landsins eftir einhverjum fáránlegum reglum sem enginn skilur.

Er ekki einhver í hópi þeirra sem vita ekki aura sinna tal sem vill hlaupa undir bagga með fólki sem situr sólarhringum saman yfir börnum/barni sínu deyjandi ?

Datt engum í hug að nota það sem flóði nýlega úr sjóðum bankana í eitthvað þarfara en að fljúga með góðvini til annara landa til að hlusta á óperu ?

Ég vona að þeir sem eru í vandræðum með hvað eigi að gera við "afganginn"  finni góða leið til að gera fyrir sálu sinni og geri það með öðrum hætti en að fljúga til útlanda til að leika sér með jafningjum.     Það er fullt af fólki sem á bágt og Guð hjálpar jú þeim sem hjálpast að.

Mínar innilegustu samúðarkveðjur til foreldra og annara ástvina Védísar Eddu.

Hamingjan ekki alltaf þar sem maður heldur að hún sé.

Það er sorglegt að hafa farið í gegnum erfiða aðgerð og náð að léttast um X mörg kíló en vera ennþá jafnveikur og áður en aðgerðin var gerð.      Matarfíkn er ekki auðveldari eða ómerkilegri fíkn en aðrar fíknir  og ber að taka á henni sem fíkn með öllum þeim aðferðum sem best hafa reynst í meðferð fíknar.    Þar eru 12 sporin og Æðri máttur bestu verkfæri batans  ásamt mörgu öðru.         Ég er ein af þeim sem hef lengi barist við offitupúkann og alloft náð yfirhöndinni en líka lotið í lægra haldi fyrir honum.     En síðustu 3-4 ár hef ég orðið að játa mig sigraða og ekki náð neinum árangri þrátt fyrir ítrekaðar tilraunir.    Að lokum ákvað ég að játa ósigur minn fullkomlega og ákvað að skoða hvað OA hefði uppá að bjóða og viti menn þar er lausn!!!-   Ég hvet alla þá sem eru búnir að gefast upp fyrir matarfíkninni að skoða heimasíðu OA (það eru til fleiri samtök með sömu markmið) og kanna hvort það er ekki ljós í myrkrinu þar.    Margir hafa fundið lausn sinna vandamála í svona samtökum og þar styður hver annan og það er svo frábært.     Ekki láta matarfíknnina sigra !!!  

Hefur losnað við 100 kíló

Guð láti á gott vita

Það er von mín að nú sé bæjarstjórn Kópavogs að ná áttum í þessu máli sem hlýtur að varða alla Kópavogsbúa - einkum okkur sem búum á Kársnesinu.     Byggðin á Kársnesi er eins og allir íbúar þar vita lágreist og göturnar jafnframt frekar þröngar og geta ekki með nokkru móti borið þungaflutninga.    Það er grátlegt að sjá vörubíla og gámaflutningabíla reyna að troða sér þar sem er ekkert pláss fyrir þá - enda sést oft hvar þeir hafa farið um - búnir að ryðja niður ljósum og skiltum.  Ef skipulags- og bæjaryfirvöld væru að kynna ný mannvirki fyrir bíla að og frá Kársnesi eins og t.d. göng undir eða brú yfir Fossvog þá væri umræðan vafalaust allt önnur.    En engan undrar það að íbúunum hrjósi hugur við þessu skrímsli sem fyrirliggjandi tillaga er.     Hvað höfum við að gera með stórskipahöfn hér ?      Er ekki alveg nóg að það séu smábátahöfn og það sem henni fylgir ?    Hvernig væri að efla þjónustu t.d. við skútueigendur og þá sem heimsækja Ísland á slíkum skipum ?   Í kringum það  mætti vel hugsa sér þjónustu af ýmsu tagi sem ekki krefðist mikilla flutninga til og frá höfninni.    

Það er ekki undarlegt að íbúar hér séu uggandi yfir fyrirliggjandi  skipulagstillögum og mótmæli.    Við sem kusum þessa bæjarstjórn yfir okkur munum vonandi hugsa okkur vel um næst þegar gengið verður til kosninga, hvort vert sé að veita þessum mönnum aftur umboð til að stjórna bænum.    Það er að segja ef þessum skipulagstillögum verður haldið til streitu.   Það er ekki líklegt að það gleymist ef af verður.

Átök um skipulag Kársness í Kópavogi

Töfrar í tónum - snilldarútsetningar, snilldarflutningur !

Ég fór á konsert í gær -  og varð vitni að hreinum töfrum.    Kórinn hennar Tótu söng af snilld bæði lög sem algengt er að heyra hann syngja og svo  lög Emilíönu Torrinin sem voru útsett af Didda fiðlu.   Ég hef lengi vitað að Diddi væri snillingur en þetta var töfrum líkast.     Þessi lög sem eru indæl og ljúf urðu að perlum þegar Diddi var búin að meðhöndla þau fyrir kórinn.  

Þetta var eitt skemmtilegasta laugardagskvöld sem ég hef upplifað lengi.   Ég vona að við fáum að heyra meira af þessari tónlist með þessum frábæru listamönnum.

Bravó !!!

Höfum við ekki orðið vör við það hér í vesturbæ Kópavogs ?

Ég veit ekki hvenær það breyttist en það hefur breyst.     Rellurnar koma allar í beinni línu þvert yfir Kársnesið (svo það fer nú að verða vafasamt að búa í Kópavoginum).    Ég man ekki betur en ég hafi lesið það einhversstaðar að öllum vélum væri beint í hægri beygju strax eftir flugtak svo þær færu ekki yfir byggð.    Nú hefur ekki ein vél hlítt þeim fyrirmælum,   ef þau eru þá gefin.    Ég er satt að segja farin að hlakka til að völlurinn fari upp á Hólmsheiði.     - Ég veit það!   Sjálfstæðismenn ályktuðu annað um helgina!!!  En ég er ekki sammála þeim í því frekar en flestu öðru.       Og nú er vorið farið að gefa okkur undir fótinn og maður farin að hætta sér út í garð.    Það þarf líklega að fara að taka vináttina áður en maður fer að vinna garðverkin því hávaðinn er þvílíkur að það er eins og allt sé að hrynja þegar þessar rellur þjóta upp, út og burt,  yfir, inn og niður.    Ég er ekkert andvíg því að landsbyggðarfólk eigi góðan aðgang að okkur hér á malbikinu en það er ekkert langt að fara þó völlurinn fari úr Vatnsmýrinni og upp á Hólmsheiði og það eru ekki allir að fara á Alþingi !!

 

Margar einkaþotur á Reykjavíkurflugvelli

Ekki klúðra

 júróvisjónlaginu áður en það fer út fyrir landsteinana !!!  Plís - leyfið Eiríki að njóta sín,   hann er að drukkna í strengjum og allskonar hávaða og ekki heyrist nema smámjálm í honum á myndbandinu.   Hvað er í gangi ?  Er þetta unnið af fagmönnum ?   Ætla þeir að láta þetta sjást og heyrast í öðrum löndum???

Lagið þetta strax !!!   Það er skömm að þessari hljóðblöndun eða hvað það er nú sem hefur farið úrskeiðis í myndbandinu með Eiríki Hauks. í júróvisjonlaginu.      Þetta er ágætislag og gæti alveg komið okkur í tveggjakvölda partý - en ekki með svona amatöramyndbandi sem er eins og það hafi verið gert á byrjendanámskeiði í grunnskóla !!   Og hana nú !!!    

Biðukollur eru ekki uppáhalds-

blómin mín.  Þá  vitið þið það !  

En ástæðan fyrir því að ég nefni þær nú á Góunni er sú að ég sé þær á sveimi  í umferðinni á morgnana og valda þær mér oft mikilli armæðu.    Einkum vegna þess hve hægfara þær eru og silast áfram með himin og haf á milli sín og næsta bíls á undan.   

Kannast einhver við þetta ?    Biðukollur eru auðþekktar á litnum eða þannig ...... og aksturslaginu - aka í eigin heimi (að mínu áliti) og hugsa ekkert um að láta umferðina flæða !   En verst þykir mér þegar ég er búin að sýna snilli mína í framúrakstri hægri, vinstri og allt um kring, þá eru biðukollurnar komnar upp að hlið mér á næstu ljósum  - hafið þið ekki tekið eftir þessu ???